Лёгка думкай лунаць у надхмар'і, Калі радасьць душу прыгарне. Я ня мог прасьпяваць табе арыі, Звонкі голас не дадзены мне. Нічога вакальнага ў голасе – Пустое паціху малолася. Слова дзесьці ў дарозе ахрыпла, У бясьсільлі дранцьвела зусім. Ты мне прысаку ў сэрца насыпала, Узьнімалася полымя ў ім. I голас прачулага лірыка Імкнуўся раскінуцца шырака. Я хацеў табе шчыра прызнацца, Што гарэў і балюча кахаў. Ад пачуцьцяў аж плечы згінаюцца – Адчуваў, і пакорна сьціхаў. Змагаўся з маёю натураю... Зацішша цьвіло перад бураю. Я маўчаў. Але ўпотай канцона Варушыла трывожна мяне. Можа сёньня, каханьнем сьвянцоная, Усхвалюе, расчуліць, кране Цябе, маю зорку праменную, Да скону нічым незаменную.
|
|